Posted in كتب

كتاب عن gamification


درافت قراءة كتيب عن gamification اسمه
An Introduction to the Use of Game Dynamics
to Influence Behavior

مقدمة في استخدام اسلوب الالعاب للتاثير علي سلوك المستخدمين

1- مقدمة عامة عن gamification
وتنطق جيميفكيشن .

الفكرة انك تحول المواقع والبرنامج والخدمات الي بتقدمها لفكرة لعبة . علشان المستخدم يفضل علي طول يستخدمها
ومن الاخر كدا بتحاول تعلي ال engagement عن طريق انك تخلي المستخدم يحب يستخدم السيرفس بتاعتك . وبتحاول تبني بينك وبين المستخدمين
بتوعك نوع من انواع ال loyalty

فيه نوعين من الجيمز 1- ديناميكية 2- ميكانيكية ودا الي بحاول اعرفه من الكتاب . ومش فاهمة قوي يعني بس بحاول

هم الاتنين شبه بعض وممكن تستخدم حاجات من هنا وحاجات من هنا . وتحط الحلو من هنا علي الحلو من هنا وتعلم شغل فنادق .

المهم اننا بنعمل موضوع الجيمفكيشن دا علشان حاجتين
Participation and Engagement

بالنسبة ل Game mechanics دي بيبقي جواها
=====================================
• Points نقط بتكسبها
• Levels مستويات بتعديها
• Challenges حاجات غتته علشان البشمهندس ميحسش بملل
• Virtual goods and spaces . دي بقا حاجات ممكن يشتريها جوه اللعبة بالنقط الي كسبها . حاجة كدا تضحك عليه بيها . وتلبسه العمه . بتبيعله هوا يعني
• Leaderboards . حاجة كدا زي قائمة الاوائل بتاع الفصل . قائمة فيها افضل ناس في اللعبة . وعلشانها بيلعب علشان يتصدر فيها .
• Gifts and charity . لو انت عامل لعبة . تعال مثلا في عيد ميلاد اليوزر وابعتله هديه . يستخدمها جوه اللعبة .

اما بقا بالنسبة ل Game dynamics دي بتكون
===================================

• Reward مكافئات وجوايز
• Status رتبه وترتيب ( ذهبي – فضي – برونزي )
• Achievement مدي انجازه في اللعبة والمستويات
• Self-expression
• Competition الي هي المنافسة ما بينه وبين اصحابه او ما بينه وبين العالم
• Altruism ودي الي هي الغيرة . انك تظهرله الناس الي حوليه وصلوا لفين في الترتيب ومدي انجازهم للعبة علشان تبدا يتفاعل مع اللعبة او البرنامج ويكمل فيه

2- الجميفيكيشن في كل مكان امثلة مشهورة علي استخدام الجمفيكيشن
تنوية : البشر بيصرفوا 60 ( مليار ) دولار سنويا علي الالعاب
اول مثال عندنا لاستخدام الجمفيكيشن
أ- Frequent Flyer Programs
=================
120 مليون شخص حول العالم بيلموا نقط وبيزيدوا في المستويات وبيكسبوا جوائز في Frequent Flyer Programs
عملائهم بيكسبوا نقط في كل ميل بيسافروه معاهم . وبيزيدوا في المستويات ( برونزي – فضي – ذهبي ) يعني انت عميل ذهبي ولا فضي ولا اسمك ايه .
ولو العميل كمل منافسة الي هي ممكن تكون مثلا ( لو سافرت 3 سفريات ال 90 يوم الي جيين مع شركتنا . ليك هدية خصم 2500 ميل من السفر بتاعك )

ب – Starbucks and Foursquare
=============
اكبر سلسلة كافيهات بتقدم نظام نقط . ونظام ( فلوس تخيلي )
ستاربكس . بيستخدم فورسكوير في الموضوع دا وبيخلي الناس تعلم تشكن ان في الفروع
وطبعا اللعبة هنا في انه بيطلب مثلا منك تعمل تشكن في 5 فروع مختلفة لستاربكس
وكل ما تعمل تشكن تكسب نقط
من المهم هنا اننا نعرف ان النقط دي ملهاش قيمة مادية حتي ال ال ( فلوس التخلية ) ملهاش اي تلاتين لزمة في حياتنا
بس برده الناس بتعمل تشك ان
تفتكر ليه بقا الناس بتعمل تشك ان ؟

ج- Nike+ and the iPod
===========
سنة 2008 قررت شركة نايكي انها تسخدم اسلوب الجميفكيشن
كل الي عملته انها استخدمت برنامج بينزل علي الايبود وبيستخدم السينسورز في انه يقرا المسافات الي الشخص بيجريها
ويبدا يجمعوا الداتا . والناس تتنافس بينهم وبين بعضهم

3- THE BUSINESS VALUE OF GAMIFICATION
القيمة المضافة للمشاريع من استخدام الجمفيكيشن .
======================
من اكتر المشاكل الموجوده في البيزنس . انك تخلي فيه engagement
ولو قدرت تعمل الموضوع دا . الدنيا هتلعب معاك ومحدش هيقدر يكلمك بعد كدا
استخدام اسلوب الجمفكيشن بيقدر يخليك تعمل الموضوع دا

— الاحصائيات اهم العوامل لنجاح الانجيجمنت
=======
لو عندك شخصين بيلعبوا بعض . وكل واحد فيهم بيكسب التاني . لمدة اسبوع . ايه الي هيحصل ؟
ولا اي حاجة . هيزهقوا ومش هيلعبوا تاني
لكن لما تبدأ تظهر لكل شخص منهم
1- عدد مرات فوزه علي الخصم
2- الفلوس الي معاه
3- ترتيبه
4- النقط الي معاه
شوية اسئلة علي الاحصائيات دي ممكن تظبطلك الدنيا
زي مثلا . تقدر تطلع الاول علي المجموعة بتاعتك لفترة قد ايه تقريبا ؟
طيب علي مدينتك ؟ علي دولتك ؟ لفترة قد ايه ؟
ممكن في لعبتك او في مشروعك تحجز او 5 ليهم جوائز زي كاس مثلا . او ميداليه

4- مين الي لازم تعمله مشاركة وتعمل معاه engage
=============

زي ما قلنا الجمفكيشن مهمتها التاثير علي سلوك الناس .
الناس دول بقا ممكن يكونوا
1- عملاء .
2- موظفين .
3-طلبه
4- معجبين
5- المرضي
6- اي حد تاني
لو بتدأت تستخدم اسلوب الجميفكيشن . انت مش محتاج انك توصل لجمهور الناس الي بتحب تلعب
في العادي الناس كلها هتتعود علي الاسلوب دا وهيحبوه وهيحصل ما بينك وما بينهم انجيجمنت

الكتاب بيشرح شوية كيس ستاديز ممكن تستعدين بيهم وتذاكرهم
لتحميل الكتاب
http://goo.gl/UrIZZj

الشكر موصول ل Mohamed NeamatAlla لانه فتح المجال النهارده ان حد يكتب في الموضوع دا . وخلي الواحد يرجع يذاكره من تاني
‫#‏الطريق_الي_ايلات‬

Posted in كتب

كتاب . طريقة كتابة Business Plan الخاصة باحلامك


دا درافت لكتيب اسمه .
How to Write the Business Plan of Your dreams

كلام اغلبها عارفينه بس محتاجين نفتكره كويس
===================

1- المؤلف مهندس . مكنش عنده اي خلفية عن البيزنس بلانينج
وقرر انه يعمل شركة . كل اسبوع كان بيروح المكتبة يقرا عن الموضوع . هو كان ابيض في موضوع البيزنس دا

2- الكتاب مش بيبص للبيزنس بلان بصورة عميقة هو موجه للناس الي محتاجه تعرف وتحاول تنجز . ومش بيشرح كل جزء في بلان بشكل مفصل

3- لو عاوز تستزيد في مواضيع البيزنس . موقع MoreBusiness.com بيتم تحديثة بشكل اسبوعي وفيه مقالات مهمة جدا

4- الخطط طويلة الاجل وقصيرة الاجل (الاهداف ) :
عاوز تبقي ايه ( كمنظمة او كشركة ) في خلال 20 سنة ؟ 10 سنين ؟ 5 سنين ؟ سنة واحده ؟ 6 شهور ؟

5- لو انا سالتك دلوقتي عامل خطة مستقبلية لنفسك ياترا هتكون الاجابة ايه ؟
دايما بنسمع مقوله . اذا لم تعرف اين تذهب فكل الطرق تفي بالغرض .
فلو انت مش عامل لنفسك اهداف محددة خلال اوقات محددة .
فليه عاوز تعمل شركة ؟ بلاش احسن .
لو مفيش خطة …. عمل شركة زي عدمه . مفيش اصلا اهداف انت حاططها علشان تقدر تقيس هل انت نجحت ولا فشلت

6- الاهدف :
1- الاهداف علي مدي الحياة . قم بكتابة 100 حاجة انت عاوز تعملها . ولو كبرت في السن تقدر تقول انت نجحت في حياتك ولا لاء .

2-الاهدف علي المدي الطويل . اكتب شايف نفسك ايه بعد 20 سنة . يا ترا : ؟
أ – هتكون قاعد في مكان كويس وجنبك المدام .و بتشرب مشروب غالي ( تقريبا الي مكتوب في الكتاب دا نوع خمره ) ؟ ولا
ب – ياترا هتكون او هتكوني مجرد شخص بيربي عياله وعيال عياله ؟
ج – ياترا هتكون/ي شغاله في شركة في مجال مختلف عن مجالك الحالي ؟
شايف الاسئلة دي . دي خاصة بحياتك . حاول بقي تسال اسئلة زيها خاصة بالشركة بتاعتك

7- حكاوي الاسانسير .
ولمواخذه لو قابلت حد وانت ماشي من باب العماره لغاية الاسانسير واول مره تتقابله ياترا هتقوله انت بتعمل ايه ؟
ياترا هتبدأ تفكر اصلا انت بتعمل ايه ؟ ولا هتكون مجهز كلام في العادي من قبل كدا ؟
شبكه علاقاتك بتتبني بالكلام الي هتقوله لما تيجي تعرف نفسك لحد . فهل ياترا انت مجهز كلام عن نفسك . ولا كل ما تقابل حد بتجوّد ؟
ولو انت مش عارف تقول انت بتعمل ايه بشكل واضح . ياترا الناس هتعرف ؟

اختصر وانجز : في البيزنس ما تبقاش عيل رخم وانت بتتكلم عن نفسك . قول المفيد ومتكترش
ولما حد يسألك اكتر عن الي بتعمله . ابقي احكيليه اكتر

وخليك مجهز كل حكاوي الاسانسير . الاختصار . والكلام الكتير .

واستشهد بابراهيم لنكولن لما كان بيقعد اسبوعين يجهز في خطاب هيقوله في نص ساعة .

الكتاب بيديك امثلة علي ازاي تعمل حكاوي الاسانير دا .

8- حدد مين هم العملاء بتوعك .
مش كل الناس عملائك .
9- مين هم منافسينك .
مين الي ناوي ياكل اكلك

10 – الشكل الهيكلي للخطة .
– شكل البيزنس بلان .
1 – Executive Summary . دي هتحطها اخر حاجة . ملخص من صفحتين عن الي بتعمله في البيزنس بتاعك
2- Company Profile . مش محتاجه شرح . دي اجابتها من الاسئلة الي انت سالتها لنفسك من شوية .
3 -Goals . ودي هتجيبها برده من اجابات الاهداف طويلة الاجل وقصيرة الاجل واهداف السنين .
4- Market Definition . استخدم الجزء بتاع مين هم عملائك .
5- Competitive Analysis . استخدم الجزء بتاع مين هم منافسينك الي ناويين ياكلوك
6- Marketing Strategy . الجزء دا بقا هيتعمل بانك تكتب هتجيب عملاء ازاي ؟ وهتوصلهم ازاي ؟
7-Management Qualifications . ودا حاجة بسيطة مش كبيرة . بتكتب المديرين الي المفروض يكونوا في المشروع ايه مؤهلاتهم . ومين هم .
8- Financial Information . وهنا هتحط احصائيات وشوية شيتات عن المشروع هيجيب كام فلوس . وهتدفع كام علشان تجيب كام .
9-Appendices . هنا هتحط الحاجات الي انت محتاج تحطها ومش لاقيلها مكان . زي مثلا خصائص المنتجات بتاعتك .

فيه كمية كبيرة من البيزنس بلان موجوده علي موقع http://www.morebusiness.com
ممكن تشوفها وتتعلم منها

لتحميل الكتيب .

http://goo.gl/21vmV2

‫#‏الطريق_الي_ايلات‬
‫#‏ريادة_الاعمال‬
‫#‏خطط_الاعمال‬

Posted in سوشيال ميديا

انواع المحتوي الغير هادف المنشور علي السوشيال ميديا عربيا


الدليل البراق علي اتجاه ال #سوشيال_ميديا لسوريا والعراق
======================
انا مش تخصصي سوشيال ميديا بس دا تقريبا نوع المحتوي المقدم الفترة الي فاتت علي الصفحات الي بتحاول تعمل محتوي ينتشر بسرعة

فصفحات الهري الي انتشرت جدا في الفترة الاخيرة
والي مش بتقدم اي قيمة حقيقة . ولو سألت صاحبها عاملها ليه وايه القيمة المضافة للناس مش هيعرف يجاوبك
بتعتمد علي اكتر من اسلوب .

1- صفحات منهم  بتعتمد علي اسلوب ثبت العبيط . او العبيط دايما علي حق
بمعني
===========
تدخل علي صفحة منهم تلاقيها بتتكلم عن ان الدراسات اثبتت ان الشخص العبقري فقط هو الشخص الي مكتبه ودولابه  دايما ملخبط ومش مرتب .
وتلاقي الزباين عجبها الكلام وعامله شير اثبات ان العبقرية هتبظ من عنيهم

2- صفحات معتمدة علي مبدأ سواقين الميكروباص اسلوب حياة
==========

ودي صفحات بتعتمد علي ان اغلبنا عنده عقد نفسيه وشايف انه دايما مظلوم
فبدل ما يشغل مصطفي كامل ويتقال عليه زي سواق ميكروباص بدأ يستمتع بكلمات مصطفي كامل والحانه في شكل مقروء علي السوشيال ميديا بيشرح ازاي الدنيا صعبة وازاي صحابنا خنونا وازاي لازم ندوس علي قلبنا مع ان الموضوع صعب علينا

3- صفحات معتمدة علي مبدأ كلنا حمدي الوزير
========

ودي من غير كلام كتير . بتعتمد علي نشر المحتوي الجنسي وشبه الجنسي مش لهدف جنسي طبعا
الا يحقق التارجت بتاعه من الزوار علي موقعه .

4- صفحات بتعتمد علي مبدأ رايا وسكينه
ودي الي الصفحات بتفبرك محتوي كانه اتبعتلهم علي الرسائل ونوع المحتوي دا بيدور حول ان خطيبها جابها 4 كيلو دهب وياقوت ومرجان
وهي بتحبه . وابوها موافق
بس هي مش موافقه -معرفش ازاي-
وطبعا تيجي رايا وسكينه تبدأ تشير الكلام دا وتمنشن صاحباتها علشان يشوفوا حظهم الاخبر ولو شافوا البنت دي ممكن يدبحوها

Posted in عام

حل مشاكل النسيان والتوهان وعدم القدرة علي الحساب


اغلبنا بطل يستخدم دماغه في الحسابات والعمليات الرياضية بسبب استخدام الكمبيوتر والآله الحاسبة

وللسبب دا بدانا نفقد قدرتنا علي حساب الارقام . لدرجة ان احيانا الواحد بيستخدم صوابعة علشان يفتكر . وفيه ناس نسيت جدول الضرب .

المشكلة الاكبر ان عدم استخدامنا لدماغنا بدأ يجيب حاجة تشبه الزهايمر عند كل مستخدمي الكمبيوتر والانترنت
الي هي النسيان والتوهان والتشتيت

وما الحل ؟
========
1- في الجزء الخاص بالنسيان

الحل بالنسبالي في اني الاقي حاجة مسليه وممكن اعملها بطريقة سهله ومع اي حد .فقررت من فترة كبيرة العب ( ضومنه ) -دومينو – اللعبة دي بتخليك تحاول تفتكر الارقام . ( الي بيلعب قصادك المرة الي فاتت لعب كام . والي قبلها لعب ايه . طيب انت خليته يلف علي ايه في الدور الي قبل الي فات ) وبتخليك تركز جامد

2- الجزء الخاص باستخدام الدماغ والارقام
قررت من يومين اني انزل ابكليشن علي الموبايل يساعدني في كدا . دخلت علي بلاي ستور وكتبته كلمة math . ظهري اكتر من برنامج اخترت منهم برنامج اسمه
king of math
البرنامج دا عبارة عن لعبة لها مستويات بيديك مسائل رياضية تعملها في دماغك بدون استخدام ورقة وقلم .
طبعا فيه شخص ممكن يسالني ويقولي ما انا ممكن استخدام آله حاسبه في الحل …… ودا مش هرد عليه :]
اول ما بتنزل البرنامج بيطلق عليك فارمر — وبشغل معهد ترجمة ممكن نقول انك ( مزارع او فلاح 😀 ) وبيبدا يتدرج معاك في المستويات لغاية ما تبدا تحسب بطريقة سهله وبسيطه .

لتحميل الاببكيشن ممكن تدور علي الستور او تنزله من هنا
http://goo.gl/IOPXpc

وبالنسبة للعبة الضمنه . وانت معدي علي اي قهوة هتلاقي مصر كلها بتلعبها
للعلم لعبة الضمنه من اكتر الالعاب برده الي بتخليك تحسب وتجمع

#الطريق_الي_ايلات