Posted in عام

هل جوجل بيعرف المحتوي المكرر والمنقول ؟ اازي ؟


البوست دا برده هيتكلم في #SEO
هل جوجل بيعرف يوصل للمحتوي المنقول ؟ طب ازاي ؟
هل بتوع ال Black hat ساكتين علي تحديثات جوجل ؟
===============================================
مسرحية مبتخلصش . دا ابسط تعريف للي هحكي عنه النهارده ( القط والفار )
الابطال .
google : الي هو محرك البحث
الجماعة بتوع ال black hat : ودول الي بيتحايلوا علي نتائج البحث علشان يظهروا غصب عن جوجل .

خلينا نبص للموضوع من وجهتين نظر مختلفين تماما
1- جوجل 2-  الجماعة حبايبي بتوع ال Black Hat

1- جوجل كمحرك بحث كل همه انه يقدم المعلومة الي المستخدم عاوزها والي بيدور عليها
لو جوجل ظهر للمستخدم حاجة غير الي هو عاوزها . المستخدم هيدور علي محرك بحث غيره . جوجل مش بيعمل كدا علشان المستخدم حبيبه . لاء علشان المستخدم = اعلانات = فلوس
2- بتوع البلاك هات : كل همهم انهم يجيبوا زوار من جوجل باي شكل . علشان يخلوا ترتيب الموقع بتاعهم كويس . وعلشان الزوار = اعلانات = فلوس
فكل يبكي علي ليلاه

نرجع نشوف الموضوع من البداية ايه الي حصل فيه
======================================
الناس في جوجل كانوا بدائيين وبيظهروا النتائج حسب شويه factors عبيطه . ملهاش اي تلاتين لزمة
ولما الفاكتورز دي اتكشفت الجماعة بتوع البلاك هات . عرفوا يتحايلوا علي جوجل ويظهروا نفسهم في نتائج البحث غصب عن جوجل
بعض الامثلة  لموضوع الفاكتورز الفشنك دي .
1- الباك لينكس
2- تكررار الكلمات في الصفحة بشكل كبير
3-تكررار الكلمات في ال keywords كتير
4- صفحة لا تحتوي الا علي الكلمة المستهدفه فقط بشكل مكرر

بعد ما الموضوع بدأ يعصب جوجل . فكروا انهم يغيروا في ال algorithm بتاع اظهار النتائج
الكلمة دي بنسمعها كتير . بس يعني ايه
=====================================
algorithm دا عبارة عن طريقة عمل شئ معين . مش سحر ولا شعوذه زي ما الناس ما هي فاكره
يعني algorithm عمل الشاي بيكون ازاي ؟ :
1- تحط المايه علي النار
2- تحط الشاي في الكباية والسكر
3- تصب الشاي وتشرب

فيه ناس بتعمل الشاي بطرق مختلفة . ودا بالظبط الي بيحصل في جوجل هم بيعملوا algorithm لاظهار نتيجة البحث . يطلع البحث تقيل سكر زيادة . يخففوا السكر ويزودوا مايه
وهكذا . كل ما الجماعة بتوع البلاك هات يزودوها . جوجل تغير ال algorithm بتاعها الخ

نرجع للقصة بتاعتنا . ونعرف ايه الي جرا
================================
الجماعة بتوع البلاك هات لقوا جوجل محرك فرفور والفاكتورز بتاعته مضروبه . بدأوا يستخدموا الي فهموه في انهم يطبقوا عندهم علي مواقعهم
وبدأوا يعملوا حاجات كتير . اهمها الي هنتكلم عنها دلوقتي وهي نقل المحتوي . ( سرقة المحتوي )

* موقع لسه جديد بيعمل محتوي محترم .
ييجوا بتوع البلاك هات . ينقلوا منه المحتوي ويسرقوه . ولانهم عارفين جوجل بيظهر النتائج ازاي . يطلعوا في اول نتيجة في البحث
وكدا الراجل الطيب الي عمل محتوي محترم . خد صابونه
والفلوس كلها راحت لبتوع البلاك هات . وهكذا
وعلشان كدا جوجل قرر انه يعمل فلتر للمواقع الي بتسرق محتوي . والمواقع الي بتستهدف كلمات معينة بشكل Spam
جوجل عمل التحديث من هنا . وبداوا الناس تبوع البلاك هات في انهم يفكروا في فكرة جديده .؟

سالوا نفسهم سؤال حلو بصراحة ؟
هو ازاي جوجل بيعرف المحتوي المنقول او المكرر  ؟
============================================
الاجابة دايما بتكون في انك تحط نفسك مكان الشخص التاني . وتشوفه بيفكر ازاي ف
لو قلتلك الجملة دي
ذهب فرجاني الي الشركة …
وجملة تاني بتقول
ذهب فرجاني الي الشركة …

هل تعرف تقولي ايه الاختلاف ؟
====================
كلامك مظبوط مفيش اختلاف  .مهندسين جوجل عملوا الوغريثم جديد لمقارنة المحتوي في الصفحات .
بمعني الجملة الي فوق دي مطابقة بنسبة 100 % للي فوقها
وبالقياس علي بعض الاماكن في الصفحة . ممكن نستنتج ان الصفحة دي سارقة محتوي . ولا موضوع حصري unique content

بتوع البلاك هات بيقولوا : ايه العمل ؟ هل تتركونه يدمر استثماراتكم ؟
==========================================
راحوا لبعض المبرمجين وقالولهم تحلولنا الموضوع دا ازي ؟
المبرمجين قالولهم احنا ممكن ندخل جزء من الذكاء الصناعي artificial intelligence
الجزء دا اسمه NLP او natural language processing ودا بالعربي يعني . ( معالجة اللغات الطبيعية ) تحته اكتر من فرع
في فرع منهم الي هو تركيب الكلام والاعراب
الي يهمنا اننا عارفين ان الكمبيوتر غبي .
 ومش بيفهم الكلام بتاعنا . علشان كدا عملوا موضوع معالجة اللغات الطبيعية . ازاي يخلوا الكمبيوتر يقدر يتعامل مع اللغات الطبعية للانسان
بمعني . في المثال الي فوق بنقول .
ذهب فرجاني الي الشركة …
ايه الي هيحصل لو الكمبيوتر عرف ان الجملة دي بتتكون من:
1- فعل
2- فاعل 3
– حرف جر
4- اسم مجرور و (الي الشركة ) علي بعضها . دي جملة في محل نصب مفعول به
انا لما فهمت الجهاز الجزء دا . انا نقلت المعرفه بتاعتي ليه . وعرفته ازاي يعرب الجملة . وازاي تركيبها . ولو عرف الموضوع دا ممكن يفكر زي الانسان
طيب يعني ايه برده الكلام دا . ؟
===============================
باختصار شديد . الجملة مش هتتغير معناها بالنسبة لليوزر  لو اتغيرت من
ذهب فرجاني الي الشركة …
الي
فرجاني ذهب الي الشركة …
المحتوي الي حد ما جديد بالنسبة لجوجل او بقا
فرجاني في الشركة  وهكذا .
كدا الجملة معناها زي ما هو . واتغير في جوجل . وبقي محتوي جديد
الجماعة بتوع البلاك هات دول بيعجبني دماغهم😀

وهكذا لعبة القط والفار ما بين جوجل وبتوع البلاك هات ؟
نيجي لاخر جزء .
وهو جوجل بيعرف محتوي المحتوي المكرر والمنقول . الجماعة بتوع البلاك هات مسكتوش . انما بدأوا يطوروا الالوغريثم بتاعهم في الحط علي جوجل
==============================================
وعلشان كدا اخترعوا حاجة اسمها blogging . وفي العادي الكلمة دي معناها التدوين لكن ليها مدلول تاني عند بتوع البلاك هات
هم قالو : انا لو هنقل محتوي وهحطه في مدونة  جوجل مش هيظهرني كتير في النتائج .
طيب ليه معملش عدد (1000 ) مدونة مختلفة .😀 ولو هاخد من كل مدونة منهم 1 دولار في الشهر بس هاخد 1000 دولار
ايه 1000؟
 عادي وممكن اكتر . ما انا كدا كدا مش بكتب محتوي
انا بعمل المدونة . واحط فيها الاعلانات بتاعتي وعندي البرامج بتاع الذكاء الصناعي الي بتعمل الموضوع دا . وبتجبلي المحتوي وتعدل عليه . وتعمله حصري
( شايفك يالي بتفكر وبتقول هتعمل الموضوع دا ). للاسف العربي تقريبا zero في موضوع ال NLP علشان مفيش حد كتير شغال في المجال دا . لانه غير مجدي ومفيش شركة راضيه تشتغل فيه
الموضوع بدأ طبعا يقل بشكل كبير في جوجل . بس البلاك هات مش هيسكتوا
البوست مش توجيه للناس انها تشتغل بلاك هات او وايت هات . هو مناقشة لافكار ال SEO بطريقة برمجية سهله
المهم البوست دا ناقش . هل جوجل بيعرف المحتوي المكرر .؟ هل جوجل بيعرف المحتوي المنقول ؟ ازاي ؟

#تشريح_محركات_البحث
#السبوبة
#تشريحات_محركات_البحث
#اعمل_الصح
#شير_في الخير

===========================================
رد ايمن سعد علي الموضوع باضافة مميزة .
يبارك فيك يا محمد انا سعيد والله ونفسى كل الناس اللى ليها فى المجال تخش تدلو بدلوها ،،

طبعا مما لاشك فيه قدره جوجل كل يوم بتتطور لتمييز المحتوى الاصلى عن المحتوى المنقول ،، ومن المؤكد ان الناس اللى شغاله بلاك هات كل يوم نسبه كبيره منهم بتشتغل يمين وتسيب اللى كانت بتعمله وكل يوم عن التانى الناس بتبدا تهتم بالـ Content Marketing وانهم يبذلو مجهود فى اضافه قيمه للمستخدم بتعهم ،، والدليل ف الصوره المرفقه

ناس كتير اوى كانت بتضرر من سرقه المحتوى بتعهم لا وكمان المواقع اللى سرقه كانت بترانك ف الاول ،، جوجل من خلال بعض خوارزمتها كانت بتحاول تقران النسختين ببعض ،، من حيث العبارات المستخدمه فى كلا المقالتين ومن خلال تاريخ النشر ،، لكن كل ده كان من الممكن يتلعب فيهم ،،

مؤخرا بدات جوجل بتقديم فكره Google Authorship ،، واللى من خلالها كاتب الموضوع بيربط بين اكونته على جوجل بلس بموقعه لاثبات ملكيه المحتوى ،، طبعا ناس كتير هتقول ما الناس الشمال يقدرو يعملو نفس الموضوع ،، جوجل بدات تدى Weight لكل author واللى اعلى مصدقيه ، المحتوى بينسب ليه ،، نسبه ال engagement على المحتوى ده بيعتبرها جوجل دليل على ان المحتوى ده unique وان هو الاصلى غير نفس المحتوى اللى موجود فى موقع السارق

كمان Domain Authority عامل مهم جدااااا فى تحديد انهى نسخه الاصل وانهى نسخه اللى مسروقه ،، وعشان جوجل تردع الناس اللى لسه بيسرقو بقت بتصدرها تحديثات ال Panda

عدد اللينكات الخاريجه اللى بتشير لصفحه الموضوع الاصلى واللى مسروق احد العوامل اللى جوجل بتعتمد عليها فى تحديد المحتوى الاصلى من المسروق ،،

كمان ال Domain age احد العوامل اللى بتساعد جوجل تحدد مين الاصلى ومين اللى سارق ،

فى حجات تانيه كتير قد تكون جوجل بتعتمد عليها ،، ممكن اكتب فيها كتير ،، لكنها فى الاخر هى تكهنات شخصيه ،،

من ضمن الحجات اللى جت فى دماغى دلوقتى برده هى ان :

موقع A فى نفس المقاله اللى فى موقع B
,وموقع A فى نفس المقاله الى فى موقع C

لما يتكرر الامر ، يصبح دليل ضمنى ان موقع A هو اللى بيسرق المحتوى وبتبدا جوجل تعمله Devalue فى صفحه نتائج البحث لحين اثبات انهم حراميه وتبدا تعقبه بغباوه

ممكن حد يقول ، ان الحرامى هياخد الكلام ينحكشه ويغير ترتيبه ويبقى كده جاب محتوى جديد ،، جوجل برده بتقدر من خلال برمجيتها انها تتعرف على الكلام ده صحيح مش بنسبه 100% بس بنسبه كبيره بتقدر تتعرف عليه وكل ما الوقت يمر كل ما جوجل هتقدر تميز ده ،،

بخصوص الـ natural language processing
فطالما هو يستخدمون التكنلوجيا “machine” فى اللعب مع جوجل ،، فجوجل قادره انها تعمل حاجه شبييه تكشف التلاعب اللى معمول فى المحتوى الاصلى من خلال updates فى ال Algorithm مضاد للكلام ده

كنت كتبت مقاله هنا عن طريقه تساعد اصحاب المحتوى الاصلى انهم يعملو index للصفحه بعد ما ينشروها على طول ،، ويكون ده بالنسبه لجوجل دليل ان المحتوى ده ظهر ف المكالن ده اول واحد

صحيح ده لا يضمن لك انك ترانك الاول ، بس هو عامل مساعد ،، ممكن تقروها هنا :
http://www.seoarm.com/fetch-as-google/

الكاتب:

مبرمج ومطور ويب مصري الجنسية - من مواليد محافظة المنيا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s