Posted in عام

ليه بنحس ان فيه بطالة في مصر


هل فيه بطالة فعلا في مجالنا ؟ #برمجة #تصميم #ماركتينج
=====================
ليه مش بنلاقي شغل وبنحس ان فيه بطالة ؟
============================

هل فيه نقص في الوظايف في مجال البرمجة والتصميم والماركتينج ؟
=============================
الاجابة لاء .
بالعكس .
 دا حتي لو فيه بطالة . مجالنا من المجالات القليلة الي ممكن تشتغل من البيت في اي شركة تانيه في العالم .
حتي لو فري لانسر علي المواقع المعروفه

 * بس خلينا نقول ان الشركات مش لاقيه حد يشتغل فيها . اه فعلا مش لاقيه حد يشتغل فيها

طيب ليه حضرتك وصاحبك مش لاقيين شغل لغاية دلوقتي في شركة ؟
================================
اوعي تفتكر انك ممكن خلال فترة الجامعة تلعب . وبعد ما تخلص تشتغل
اوعي تفتكر انك ممكن خلال فترة الجامعة تقضيها كافتيريات . وخروجات . وتنفض لمستقبلك
وبعد ما تخلص تلاقي المستقبل مشرق
يعني بفرض انك في حاسابات ومعلومات . او في علوم حاسب او اي حاجة موازية للموضوع او مش في جامعة اصلا
ايه الي يخلي واحد صاحب شركة خاصة (ميت خط تحت كلمة خاصة دي)

ايه الي يخليه يشغل واحد هيكون عال عليه في الشركة
ما هو مش فاتح الشركة تكيه .
ولا هي شركة خضار ممكن تاخد عربية وتطلع تبيع بيها زي واحد صاحبنا ما كان عاوز يعمل فينا

هو بيسال نفسه كام سؤال
هل الشخص الي جي دا هيضيف قيمه للشركة . ؟
هل الشخص الي جي يقدم دا . هيعمل الشغل المطلوب منه ؟
هل الشخص الي جي دا . علي قدر معين من العلم . وعلي قدر معين من الشغل العملي والخبرات السابقة ولا لاء
===========================================
يعني من الاخر . ايه الي يخلي شركة تشغل واحد عال عليها ؟
خلي بالك انا بتكلم عن الشركات الخاصة
مش بتكلم عن الشغل الحكومي . لو بتدور علي الشغل الحكومي البوست دا مش هيتكلم عنها ولا عمري هتكلم عن انك ممكن اصلا
تكون خريج اداب وشغال تكنكال سبورت في تي داتا .
وانك كنت سيلز واترقيت من غير تأهيل وظيفي
مش هتكلم عن الجزئية دي خالص

#الزتونة
========
قبل ما تقدم لشركة . اسال نفسك انت الكام السؤال دول
هل انا كفئ اني اقدم في الشركة دي ؟
هل انا علي قدر معين من العلم ؟
هل انا علي قدر معين الخبرات السابقة ؟
هل هضيف قيمة للشركة لو انضميت ليها ؟
لو كانت الاجابة اه . توكل علي الله وقدم في الشركة
لو كانت الاجابة لاء . يبقي انت كدا عرفت فين المشكلة
وتقدر تحاول تشوف ليه الاجابات كانت لاء . وتبدأ تطور نفسك

#شير_في_الخير
#انا_مش_بتاع_تنمية_بشرية
#السبوبة
#فلوس_يابا
#الطريق_الي_ايلات

Posted in عام

ليه شغل المصريين والعرب تعبان


بما اني مطبق وعندي شغل . قلت اخد بريك . واكتب البوست دا . :] انجوي

ليه كل شغل المصريين والعرب شغل تعبان ؟
===============================

#قصة_حزينه
يحكي ان طفلا ولد بكهف . ومات ابواه . ولم يستطع الخروج للعالم لاسباب منطقية وغير منطقية .
فتوقع انه الشخص الوحيد في هذا العالم . ولا يوجد اناس غيره بهذا الكوكب اللعين . فعاش وحيدا . ومات غبيا . ولم يسمع عنه احد

دا بالظبط الي بنعمله في حياتنا
حضرتك لو #مصمم . بتقعد تشوفلك درسين فيديو علي اليوتيوب
علي درسين في منتدي من المنتديات اياهم . وتجي تجرب في اي واحد صاحبك
والحوار يدور
=========
انت : بص انا اتعلمت الفوتشوب هات الصورة بتاعتك وانا اخليك تتصور مع رونالدوا
صاحبك : يراجل . انت بتعرف تشتغل علي الفوتشوب .؟ ايوبا بقا ! سهلووو !!! . خد الصورة
==== وبعد مرور الدقائق الفارقة في حياتك وحياة صاحبك

انت : خد يا اسطي اي خدمة
هو : يا ابن اللعيبه . عملتها ازاي دي . دا انت احسن من كلاوي في فيلم الرهينة
هو : ما تركبلي صورة يا رايس جنب انجلينا .
انت : …..
هو : ….
انت : ……
=== تخيل باقي الحوار .

وانت طول عمرك ما هتطلع من جو كلاوي . هتعيش كلاوي . وتموت كلاوي . جينيص الشلة بتاعتكم
ليه ؟ علشان حضرتك حطيت نفسك في علبة وقفلت علي نفسك
الناس الي حوليك فهموك انك عملت الي محصلش . والمصيبة انك صدقتهم . وعشت الوهم دا .
طيب ممكن نعمل ايه في المشكلة دي ؟
===========================
اي مشكلة بيكون ليها حل . اول حاجة لازم تعرفها انك مدمن . مدمن الشغل بتاعك . مدمن ان الناس تمدحك
فلما تروح مكان كويس . وعندهم رؤية كويسه .
وتقولهم انا ديزاينر
والمدير يوقولك بنبرة محمد سعد بدور رياض المنفلوطي في فيلم اللمبي . ديزاينر علي نفسك وعلي شلتك برده يا ***
ليه . لانك عامل شغل بي بي .
فلازم نبقي عارف انك مدمن . ولازم ربنا يشفيك .
اولا لازم تدخل علي مواقع تشوف شغل الناس . ادخل علي مواقع الناس الكويسة في مجال الديزاين . اتفرج علي شغلهم . حاول تقلد شغلهم
قلدهم . علشان تعرف الحاجة دي اتعملت ازاي .
بس ابوس ايدك اوعي تعرضها انها من شغلك . علشان انا عارف الحركات دي . قلدهم علشان تعرف . مش علشان تسرق
كل ما هتشتغل بايدك في حاجات كتير . كل ما هتكسب خبرات

الامر ينطبق علي البرمجة برده
====================
انت بتروح تتفرج علي فيديو . تفرح بانك عرفت تعمل حاجة جديده
خدت مبادئ برمجة . ومبادئ داتا بيز . روحت نشرت ما بين اصحابك انك بتعرف تعمل موقع
علمت موقع زي الفيسبوك 😀
اصحابك عرفوا جيرانك . وحبايبهم .
واحد من جرانك عنده شركة . عاوز يعمل موقع
ييجي يتفق معاك
هو : انا عاوز اعمل موقع . بكام ؟
انت : طيب هرد عليك لما ارجع البيت ؟
انت : فرجاني . انا جايلي شغل في بروجكت وعاوز اعرف الكام بكام ؟
فرجاني : اللهم طولك يا روح وخليكي سلبه … يبني مش تقولي ايه هو المشروع وحجمه قد ايه . وايه اللغات الي هتعمله بيها . وباقي الاسئلة اللذيذه دي
انت : لاء مش مهم هو موقع صغير .
فرجاني : صغير دي كلمة نسبيه . يعني صغير بالنسبالك غير بالنسبالي غير بالنسبة لكلاوي
انت : انتو كدا يا الي شغالين في المجال عمركم ما تتحاولوا تساعدوا حد . وتروح تدين فرجاني البلوك المتين
فرجاني : الله يحرق دمك يا بعيد زي ما حرقت دمي . غور ياض يا ابن &*(_ .
========
انت تروح تقول للراجل . الموقع دا هيكلفك شاكب راكب 700 جنيه . الراجل يقولك اشطا بس هم 500 جنيه . ولما تخلص الموقع
انت : اشطا
— تلات اسابيع —
انت : امسك يا رايس دا الموقع بتاعك .
الراجل . حلو . بس عاوزه فيه الوان كتير . وبيلعب ويلعلط
انت تلعلطله الموقع

ييجي محمد عبد الباسط . وياسر علي ومحمد نصار و مازن . يدروا في الموقع . بما انهم بتوع ثغرات واخرام . يلاقوا الموقع عبارة عن مصفه مخرمة
ويحطوا عليك . يعني هي جت عليك 😀

الحل ايه بقا ؟
===============
اوعي تستعجل علي الفلوس . اتعلم الاول
نزل سكربتات بتاع ناس ابدأ اقرا فيها .
شوف برامج شركات كبيرة عملتها . اتعلم منها
نزل مثلا wordpress او جوملا او دروبال . ابدأ اقرا فيهم . اتعلم من اخطاء الاخرين
بلاش الاستعجال علي #السبوبة

#شير_في_الخير

#الطريق_الي_ايلات
#السبوبة
#فلوس_يابا

Posted in عام

ليه جوجل مش بيعرف يقرأ الجافا سكربت


بما ان النهارده صاحي بدري . ودا مش بيحصل كتير
واكيد مش صاحي بدري علشان الانتخابات . علشان انا مش بعرف ارقص

فقلت اكتب بوست سريع كدا في ال #SEO برده

ليه جوجل مكنش بيعرف يقرا ال javascript المستخدمه في المواقع
=====================================
زمان كانت جوجل مش بتعرف تقرا محتويات الجافا سكربت .
اعتقد الموضوع اتغير حاليا . هي عندها اتنين BOT واحد قديم وواحد جديد . الاصدار القديم مش بيعرف يقرا الجافا سكربت
الجديد بيقولوا انهم بيقروه . بس الافضل اننا نلعب في المضمون

الموضوع بسيط جدا يتخلص في . الطريقة الي بيشوف بيها جوجل الصفحة
ال Bot ودا زي ما قلنا قبل كدا . عبارة عن برنامج بيجلب الصفحة بتاعتك . ويشوفها بشكل HTML او txt
فهو مش بيشوف شكل الموقع زي ما انت بتشوفه . هو بيشوفه كانك عملت للصفحة view source
كل الاكود دي . هو بيعرف يستخلص منها بيانات بطريقة معينة . وقلنا ان لو فيه حد حابب يعمل بوت هيعمله ب
باي لغة برمجة + regular expression

المهم مش هطول عليكم … ( قولوا طول )
احنا كدا تاني اهو متفقين ان جوجل بيشوف الصفحة كانها سورس كود .
سورس الكود دا عبارة عن html – css – javascript – xml – …..
وحتي لو الصفحة بتاعتك نوعها php جوجل بيشوفها html  .. نعم ؟
====================================
 اه زي ما بقولك كدا هنعرف ليه دلوقتي

بص يا رايس . احنا عندنا نوعين من الكود
1- server side code
2- client side code

1- client code دا ببساطه . كل كود بيقدر يفهم وينفذه البراوزر عندك .
يعني زي html – css – javascript – xml – . دي حاجات بتتنفذ علي جهازك مش علي السيرفر
اما 

2- السيرفر كود دا معناه الكود الي  بيتنفذ علي السيرفر .
بعد ما الكود ما يتنفذ علي السيرفر . السيرفر يبعت كود التنفيذ للبراوزر بتاعك
يعني السيرفر ينفذ كود صفحة ال php ويبعتهالك بشكل html
زي بالظبط واحد اعرف بياخد الفيروس من المريض يطلعه كفته
فالسيرفر بياخد الكود php ويطلعه HTML
وعلشان كدا لما بتفتح السورس كود بتاع اي صفحة سواء كانت php او حتي jsp بتلاقيها كود html و css و javascript

كويس عرفنا الفرق ما بين الاتنين

نطبق ونفهم الدنيا عملي ازاي ؟
==============================
ناخد مثال بسيط
انا لو عندي h1 مكتوب ب html
ب HTML …….
=======================

welcome

هيظهر علي البراوزر ازاي …. هيظهر بشكل عادي جدا مكتوب welcome بخط كبير
ولو مكتوبة PHP
================

الكود دا هيحصل فيه ايه ؟ ببساطه السيرفر هينفذه . ويبعت ناتج التنفيذ للبراوزر . بشكل HTML يعني هيظهر برده كلمه welcome خط كبير

طيب لو الكود فيه javascript هيحصل ايه
================================

document.write(“welcome”);

الكود دا مش هيتنفذ علي السيرفر . الكود دا هيتنفذ علي الجهاز . علي البراوزر . ( بتاعك ) وهيعرض كلمة welcome برده بخط كبير

كدا عرفنا الفرق ما بين ال server و client

نيجي للنقطة المهمة . الي هي . ليه برده جوجل مكنش بيعرف يقرا الجافا سكربت
========================================
بما ان جوجل بيجيب محتوي الصفحة بشكل HTML يعني جوجل مفيش عندة براوزر يعرف ينفذ الكود دا عليه
يعني انت لما تعمل H1 بالشكل دا .. جوجل هيقراها بالشكل دا

document.write(“welcome”);

مش هيقرا ناتج التنفيذ . لان ناتج التنفيذ بيكون علي البراوزر بتاعك . وجوجل معندوش براوزر للبوت

ملحوظة :
1- لو في حاجة مش واضحه ممكن تسالها وهوضحها
2- للناس الي شغاله SEO ياريت نتناقش علشان نوصل لمعلومات اكبر
3- اي تعديل اي خطأ ممكن تنزله وهعدل البوست :]

#تشريح_محركات_البحث
#تشريح_محركات _البحث
#SEO
#الطريق_الي_ايلات

Posted in عام

ليه ال posts بيكون عليها تفاعل اقل من الصور الشخصية


البوست دا هيكون مايل ناحية ال #social_media
وهحاول احلل ليه الصور الشخصية بتاعتك بيبقي ليها تفاعل اكتر من البوستات  .

فلازم نسأل السؤال الصح
ليه البوست مش بيكون عليه تفاعل  كبير ؟
=====================================
الموضوع بسيط . بما ان حضرتك عندك friends كتير
وكل واحد فيهم ليه ميلوله . في ناس فيهم بتحب الجد . وفيه ناس فيهم بتحب الهلس .
فالجماعة الي شغالين في الفيس قرروا انهم يظهروا الجد لبتوع الجد . ويظهروا الهلس لبتوع الهلس

وسألوا نفسهم سؤال . ليه البوست يظهر للناس الي مش هتستفاد بيه ؟ يعني ليه البوست يظهر للناس الي مش مهتمه بيه ؟
=============================================
لو انت عندك مثلا 2000 friend والبوست ظهر ليهم كلهم . هيكون تبديد للموارد الي عندهم
الي هي مثلا
1-النت
2-الكهرباء
3-اللود الي علي السيرفر
ودا كله بيكون عبارة عن
4- فلوس بيصرفوها .
كل دا بيعتبروه موارد هم فكروا بنفس تفكير واحد اعرفه وقولوا
اظهر البوست ل 2000 لما ممكن اظهر للمهتمين منهم بس . واسيب الباقي علشان مارك

طيب بيحدد موضوع الاهتمام دا علي اي اساس
1- الاهتمام بالمحتوي : ودا بيحددها  علي الكلمات المكتوبه في ال post وعلي الهاشتاج المستخدم وعلي شويه حاجات تاني
2- الاهتمام العام . انت مهتم بالشخص دا . وبتدخل عنده علي البروفايل كتير ؟ . بتبعتله رسائل ؟ . بتقلب في صوره ؟
فانت حد مهتم بالشخص دا . فلازم يظهرلك كل الي يكتبه . كدا كدا هيعجبك وهتعمله لايك :]

كدا عرفنا ليه البوستات مش بيكون عليها تفاعل كبير ؟
وفاضل نعرف اجابة السؤال التالي :
السؤال ليه الصور الشخصية بيكون عليها تفاعل كبير ؟
===================================
بما انكم صحاب . وحبايب . وهو مش مهتم بالهري الي انت بتنزله . او بالجد الي بتنزله
فهو اكيد محتاج  انه  يعرف اخبارك الشخصية مثلا . محتاج يسلم عليك . الفيس محتاج انه يفهمك ويفهمه انكم مهتمين ببعض

وممكن نلخص الاسباب في سببين
1- عامل نفسي ليك ولصاحبك . وهو بيحاول يقربك ما بين صحابك . الي بقالك فترة مش بيظهرولك وانت نسيت انهم عندك .

2-  عامل تقني وتجميع داتا : الفيس بيحاول يعرف مين قريب من مين . لان احيانا شخص يغير الصورة وشخص تظهرله وميعملوش لايك . فكدا ممكن الفيس يفهمك انكم زعلانين من بعض . بس مش راضيين تعملوا بلوك علشان العشرة 😀

السؤال الاخير . ليه الصور مش بيكون عليها عدد لايكات = عدد الناس الي في الفريندز الي عندك
=================================
الفيس مش بيظهر الصورة لكل الناس بيظهرها لعدد اكبر من الي بيظهر للبوستات علشان يعمل فيلتر للناس . مين الي مش لازم يظهرله الصور بعد كدا تاني . وعلشان كدا الصور بتاعتك مش بتاخد لايكات من كل الفرينز الي عندك .
بيظهرها لبعضهم بس بكمية اكبر . علشان يعرف يقيس الدنيا . وعلشان الضغط علي السيرفرات

ملحوظة : انا مش شغال في مجال السوشيال ميديا . فلو فيه اي اخطاء ياريت تبلغوني اصححها :]

#معلومة
#فيسبوك
#facebook
#سوشيال_ميديا
#الطريق_الي_ايلات